古天后日誌｜中美關係僅未惡化 暫難言修好

11月17日，大致天晴，雖然氣溫唔算低，但今日都有O的風。美股隔晚續升，不過道指升幅大大收窄，道指由最多升229點，最終僅升54點；標指跟納指則升18點及120點。美國10月零售銷售按月升1.7%，升幅大過市場預期1.5%，較前一個月升0.7%高，為連續第三個月增長，且增幅創3月以嚟最高。多間多間零售商公布業績，都交到功課，表現好過預期。而中美元首視象會議，市場解讀為中美關係略見緩和，雖然有消息傳出拜登有意杯葛北京冬奧，但對市場未見帶嚟太多震盪。

至於港股呢邊，表現略為好轉，恒指成功收復10日線( 25137)、20日線( 25432)及50日線( 25215)，正朝100日線( 26036)出發，留意幾隻重磅科技股以及重磅金融類股份，能否再帶領恒指向上闖關。港股目前仍缺乏上升動力，主要係成交一直未能配合，即使大市已由24000水平攀升逾千點至接近26000水平，但期間成交未見增加配合升勢，或跟北水未有積極流入有關。而近四個交易日，北水更錄得連續淨流出。

外資相反近日卻重新配置中概股，雖然反映基金「手影」的13F文件陸續出爐，對華超級「鷹派」的前白宮貿易顧問納瓦羅8月初才狠批中概股「搵美國退休金笨」，但同類基金喺截至9月底季度業績公布後，吸納多隻中概股，未有理會文件警告，其中加州公務員退休基金(CalPERs)加注將美國公務員嘅「棺材本」押注中國企業前景。唔單止美國基金加注中概股，就連沙特阿拉伯主權基金亦首次買入阿里巴巴(09988)，以及拼多多等中概股。不過唔係全部中概股都得到外資歡心，李彥宏掌舵下醜聞不斷的百度集團(09888)跌跌不休，唔單止連累散戶坐艇，就連新加坡主權基金淡馬錫亦睇唔過眼，於上季「一股不留」沽盡手上所有百度持股。

正常美國及唔少外資基金近日開始增持中概股，但美國商務部長雷蒙多表示，美國暫時唔考慮重返早前中國宣布申請加入嘅《跨太平洋夥伴全面及進步協定》(CPTPP)，但會尋求建構一個超越CPTPP、勝過傳統自由貿易協議嘅經濟框架，跟日本等友好國家就數碼科技及供應鏈等領域合作，「期望與日本攜手應對中國過剩產能、保護兩國的工業」。換句話講，美國目前仍未有完全放低對中國嘅戒心，習拜會完結後，亦未見雙方達成任何實際協議，中美關係只係未見惡化，但暫難言修好。

古天后

(徐狄怡，證監會持牌人)