鍾嘉欣「痛失愛兒」 催淚演技獲推視后

　　(星島日報報道)鍾嘉欣在TVB台慶劇《星空下的仁醫》獲網民大讚演技躍進，前晚劇情講她的胎兒受感染死亡，鄭嘉穎搶救BB不果亦爆喊，兩人的催淚演出達至視帝視后級別，拍攝用的道具BB逼真度同獲網民讚賞。闊別熒幕幾年的嘉欣感動多謝大家支持和鼓勵，感恩得到這個角色。嘉穎則看好譚俊彥和張振朗得獎，觀眾覺得他值得攞獎已開心。

　　前晚劇情講鍾嘉欣與腹中胎兒互動之際，突然肚痛被急送進手術室，但胎兒離開母胎後已沒呼吸，縱然鄭嘉穎盡力搶救仍返魂乏術心痛流下男兒淚，嘉欣傷心得一度出現幻覺。由於這場戲所用的道具BB很逼真，網民對製作及嘉欣、嘉穎的演繹一致好評。

　　嘉欣越洋受訪時大表感謝，她指入行以來每個角色都有盡力去設計及演繹，她表示：「細個時演較年輕角色，喊嘅時候會簡單啲；但戲中角色章以芯資歷相對多啲，我自己又進入另一階段做咗媽咪，所以處理喊戲會唔同咗，要顧及嘅嘢多咗，好自然地深層次咗。」她又指該兩場重要喊戲均由心而發、順其自然：「我只係投入咗角色，俾自己身體語言同思維自然流露出嚟，再隨住劇本帶領及當日狀態，盡全力去做好佢。」嘉欣坦言做媽媽之後對演喊戲有幫助：「學套劇話齋，媽咪係有一種本能，我嘅本能就係更加連繫到我自己嘅內心世界同情緒，即係痛可以更痛。」

　　談到網民力推奪視后不二之選，嘉欣感動稱：「再次多謝大家支持，真係對我好大鼓勵，我都有成5、6年冇乜演過戲，大家都仲記得同支持我，我非常感動。我對自己演出係有信心嘅，畢竟我演咗戲十幾年，未結婚之前我都拍咗成四十部劇，有好多訓練同進步嘅機會。章以芯係我好期待去演嘅角色，我亦好感恩呢個角色俾咗我好多學習機會，無論演戲抑或處事，我好多謝呢個角色。」

　　鄭嘉穎昨宣傳《星》劇，說到這場喊戲一take過，他指有些喊戲可拍好多次，但第一次是最好。說到與鍾嘉欣有化學作用，嘉穎表示大家是職業演員，他好開心遇到嘉欣這個對手，亦讚道具部，今次的道具BB花了5位數字，效果好真實，好少道具BB可以拍近鏡。問到對爭奪視帝可會加分？嘉穎希望獎項給新人，除看好譚俊彥外，他知道張振朗為《拳王》操得好辛苦，個人意願想給未得過獎的演員，因為可能改變他們一生，比他更有意義，大家覺得他值得攞獎已開心，多謝大家支持。他又指自己一向受小朋友歡迎，最近更受家長歡迎，至於開拍續集要考慮好多因素，到時再算。

　　周家怡多年前在劇集《On call 36小時》曾癡戀馬國明，今次在《星》劇剛相反，笑言感榮幸，接下來劇中兩人開始嗌交。她說劇中好多場戲都睇到喊，尤其鍾嘉欣的BB去世，喊到似豬頭，道具BB逼真，拍完要好好處理。問可有喚起母愛，如劇中嘉欣單性繁殖？家怡笑說年輕時也不知得唔得，雖然現時年紀還可以生小朋友，但沒刻意想，知照顧小朋友心力好攰，目前沒拍拖，一切隨緣。她聽監製提及開拍續集，但不知是否成事，都擔心不及第一輯好，到時再看情況。