薛家燕嫲孫互動合唱 5個月大孫仔識和音：真係人生多驚喜
2021-11-11 11:30 
薛家燕(家燕姐)今年5月榮陞嫲嫲，兒子石耀庭（Jackson）和太太陳素怡（Zoe）誕下可愛囝囝Julian。雖然近日因為屋企裝修搬進酒店暫住，但新抱仔每周都會抱Julian見吓家燕姐。日前家燕姐上載一條開心影片興奮留言：「我的孫兒剛好五個月，竟然可以同我合唱《皆大歡喜》！真係『人生多驚喜』！」
片中見家燕姐哄孫仔笑，跟他互動，對住他唱《皆大歡喜》，片中見Julian張開小嘴，大聲為嫲嫲做和音，唱到最後，家燕姐追加唱多句「人生多驚喜」，豈料Julian好似識聽咁，真係再大大聲附和，情景搞笑，𠱁到家燕姐係咁笑，猛讚Julian叻仔！Julian轉眼間經已5個月大，正牙牙學語，而且臉圓圓好精靈、頭髮濃密好可愛，長得跟爸爸餅印一樣。王梓軒留言大讚嫲孫互動片「好正！」、「啤梨」葉文輝話：「笑死我啦，妳同BB都好可愛！」瑪姬則讚Julian好叻仔。
關鍵字
最新回應