何依婷《仁醫》出事下半身癱瘓 預告故事未完勿擔心

何依婷（Regina）在TVB台慶《星空下的仁醫》飾演善良、勤力且愛心爆棚的實習醫生Esther，前晚（1日）劇情講述她為了工作，不但休息不足且經常忘記吃飯，終捱出禍在後樓梯跌倒。昨晚（2日）一集，Esther過了良久方獲卓盈（張寶兒飾）救起，但因失救時間太長至下半身癱瘓。得悉噩耗後，Esther攬著家人痛苦爆喊，場面催淚。同期實習醫生好友卓盈、家明（林正峰飾）、博仁（林子超飾）及穎萱（黃碧蓮飾）見狀不但感心痛，還為之前一直漠視Esther伸出的友誼之手大感內疚。

網民對Esther的不幸遭遇大表同情，並為其能否繼續擔任外科醫生大為肉緊：「點解會咁㗎？咁咪冇得再做醫生」、「坐輪椅仲可唔可以做醫生」、「最好人嗰個最慘」。Regina昨晚受訪時笑言收到很多網民Inbox「慰問」，並謂擔心劇集之後會沒她的戲分。Regina笑言：「大家唔使擔心，Esther嘅故事仲未完，記得睇落去！」Regina透露該場喊戲拍攝順利，皆因劇組給予其充分時間培養情緒之餘，「實習醫生」同事亦幫了不少忙：「佢哋知道我有喊戲，埋位前冇同我玩。特別係子超，拍完之後陪我睇Playback，仲畀意見我點樣喊會再靚啲！」Regina又大讚《仁醫》中的小演員乖巧可愛兼健談：「同佢哋開工好開心！」