頭條戲場丨《蘇豪的最後一夜》一套香艷的驚慄片

睇預告好五光十色，兩位女角Anya Taylor-Joy及Thomasin McKenzie又靚又有氣質，以為玩穿越回到自己的過去?拍嗰個係《寶貝神車手》嘅Edgar Wright，咁易畀你估到咩 。故事講述一個對於服裝設計充滿熱情的鄉下妹 Eloise(Thomasin McKenzie飾)，去到倫敦讀書後每晚瞓着都會返到去60年代嘅倫敦蘇豪，然後遇到好想成名的歌女Sandie（Anya Taylor-Joy飾），鄉下妹入晒迷，幻想自己就係Sandie。(上映中)撰文:廖思慧

導演Edgar十幾年前就有拍攝《蘇豪的最後一夜》的想法，他說：「電影係我喺倫敦深夜中散步諗出嚟嘅故事，我一直對所居住的城市及60年代嘅倫敦好著迷，無論係音樂、時尚，當然仲有電影。呢個故事會激發觀眾對嗰個時期嘅劇情片和驚慄片，還有心理恐怖片類型的熱愛，並引領觀眾踏上一段獨特嘅旅程。」

好恐怖的時空穿梭
故事的確好獨特，唔睇到尾都唔知發生咩事。Eloise以為返到60年代係發夢，但有一日見到Sandie同經理人Jack(Matt Smith飾)親熱後自己條頸都有「咖喱雞」，鄉下妹覺得好新奇，好快就視Sandie為偶像，學佢染髮，連著衫都跟足，之後親眼見到Sandie遇到麻煩，Eloise都被感染，春夢變惡夢，仲慢慢發現Sandie同一單兇殺案有關。

導演玩鏡像玩到出神入化，Thomasin McKenzie同60年代嘅Anya靚到難以形容，全片疑幻疑真，結局好迷離境界。