容祖兒首次執導MV 慶出道22周年出新歌《不配》

今日是天后容祖兒(Joey)出道22周年的日子，而她也乘勢於出道紀念日推出全新廣東作品《不配》。以新歌剖白感情世界稱:「曾經好努力，但最後都要無奈放低。」歌曲紀錄了Joey成長的真實情感，詮釋了一段感情從淺到深，再到分道揚鑣的無奈至釋懷的抽絲剝繭。

這次Joey更首次執導MV，她分享道:「一切都係嚟自我對呢首歌嘅感情，我好喜歡呢首歌嗰種無奈同埋成長嘅智慧，所以我喺度諗，要搵一個好明白我對呢首歌嘅感情嘅人，其實都比較難，與其係咁，不如我自己做番導演，去令到呢首歌有一個喺我腦海裏面嘅影象出嚟。」

Fans都想知Joey執導過程，唱片公司都好有心，特別安排在今晚9時29分上載長達十分鐘的MV拍攝花絮，滿足Fans好奇心。

入行廿二年，Joey都好感觸:「其實要堅持22年真係一件唔容易嘅事，喺呢22年入面繼續遵守自己諾言、繼續成長，好多謝身邊每一個去幫助我嘅人、我嘅歌迷、我屋企人。所以我成日都會覺得用自己嘅作品去代替自己想講嘅所有說話，希望將來每一日都可以比之前每一日進步，繼續做好啲自己，希望鍾意聽我唱歌嘅人仍然聽到我好用心演繹每一首歌。」