黎姿湊女搭港鐵夠貼地　網民盼有機會巧遇

黎姿貴為上市公司CEO，身家豐厚，但她卻相當貼地過生活。她昨日（27日）在社交網上載幾張新相，竟然是帶囡囡搭港鐵，見她所拍的照片，相當熟練以手機版八達通入閘，入到車廂側企埋一邊照顧囡囡，與大眾市民乘車時的模樣沒有分別。

在帖文中留言叫人估「下一站_____？」的黎姿，雖然未有開估所到目的地，但不少網民留言想在車廂中與她巧遇。而黎姿入閘時見到其身後的歷山大廈出口，相信她是由中環入閘，而乘車時其後方的車站顯示牌，箭嘴指往金鐘方向，未知是否帶囡囡返公司呢？其實黎姿已非首次帶小朋友搭公共交通工具，早於5月時，她曾陪三個囡囡坐渡海小輪。