張繼聰被可愛女o氹到笑唔停

　　(星島日報報道)張繼聰將和愛女互動的片段放上網，冧暈一眾網友。片中見阿聰好曳，要阿女「畀hand hand」，才肯給對方食朱古力，但阿女好乖，無嬲之餘，又跳舞扭pat pat兼擺出不同搞鬼甫士，o氹得爸爸開心笑唔停，還不停叫阿女面對鏡頭繼續擺甫士，阿女當然好聽話，一直應爸爸要求扭身扭勢，難怪爸爸會冧晒！

　　謝安琪見到老公和愛女的互動片，隨即留言讚阿女：「脾氣好好，好似佢其中一位屋企人。」網友則留意指張繼聰「好鬼衰」，同時讚阿女「好得意」。