黃宗澤坐遊艇吹海風 以為佢歎緊世界原來開緊工

黃宗澤(Bosco)跟吳卓羲、王浩信及胡定欣等最近日以繼夜趕拍以廉政公署為題材的電視劇《廉政狙擊》， 雖然好忙，但佢哋忙得好開心，經常自得其樂，早前喺學校取景拍攝，一班中佬仲扮學生，話自己回到三歲，佢哋就想嘞。

尋日中秋節，Bosco上載咗兩張相到IG，一張係佢着住背心短褲坐喺遊艇上，感覺好歎，正想留言講「你就好啦」，再碌下張相，取景闊咗，見埋王浩信，唓，原來開緊工，當事人話，「祝大家中秋節快樂，不過我都係扮放假，其實都係要開工！」身處海中心開工，好好啦已經。