Anson Lo發放中秋彩蛋　與Edan四手聯彈獲讚：勁Charm

盧瀚霆（Anson Lo/AL）和呂爵安（Edan）這對「登神CP」人氣爆升，早前二人合作拍短片大受歡迎。適逢中秋佳節，AL再放彩蛋，於社交網上載短片拍攝花絮，兩位男神交換角色演奏一曲，AL大騷琴技有板有眼，更有二人四手聯彈的相片，AL寫道：「Edan就為大家表演拉小提琴，我就奉獻了久違了的技能：彈鋼琴，大家覺得我彈得好嗎？希望為大家帶來一個浪漫開心的中秋節。」片段尾聲，更有一把疑似花姐的聲音大嗌兩子：「拍嘢啦仲玩！」AL搞笑寫道：「#花姐！我真係無玩呀！」網民都紛紛留言激讚AL：「教主彈琴勁charm 」、「鋼琴王子」。

昨晚（20日）有人把當日的幕後花絮曝光，Edan在彈奏AL的歌曲《不可愛教主》，而家AL全程搭住Edan膊頭，一個彈一個唱，場面相當溫馨。最後AL再次大晒琴技表示：「我要表演一首幼稚園學鋼琴一定會彈嘅歌。」更即席彈奏兩首歌，唱歌跳舞彈琴瓣瓣掂的AL，可算是多才多藝。

除此之外，二人早前亦孖住為音樂平台做訪問，訪問以Road trip為主題，其中AL被Edan問到：「如果淨係可以帶3樣嘢去日本，你會帶咩？」AL搞笑表示：「第一，帶空氣清新劑，以防你"er"；第二，帶衫，我唔想你去旅行未買衫前着得好核突，就幫你帶多幾件衫；第三，帶錢，因為你都係一個比較大使嘅人。」Edan即反擊表示幾時有？AL笑道：「近排係食嘢方面。」最後AL被問到要揀3首歌來跟Edan去Road trip聽，AL除揀了《不可愛教主》及《小諧星》外，更選擇了《神隊友》 ，並甜蜜向Edan表示：「因為你就係我嘅神隊友」，Edan即冧爆微笑。