獨家丨拍外景劇組黑布遮陣擋鏡頭　姜濤收工郁身郁勢嘟嘴跳舞

姜濤上周在活動上不適暈倒，嚇到「姜糖」及隊友Anson Lo（盧瀚霆）喊晒。休息一日半後，姜濤繼續為彭秀慧（KP）執導的電影《阿媽有咗第二個》拍攝，仲同戲中「經理人」毛舜筠（毛姐）於社交網互Po瞓覺相，非常百厭！上周六（18日），劇組在沙田拍足全日外景，晚上再轉去油麻地茶餐廳補戲，收風好勁嘅「姜糖」遍佈餐廳門口，工作人員為保護姜濤，封黑布又出「遮陣」掩護，認真大陣仗！採訪：譚壹致

由毛舜筠、姜濤和Jer（柳應廷）主演的電影《阿媽有咗第二個》 開拍至今差不多一個月亦即將煞科，首次拍戲的姜濤做主角自然多人關注，每逢拍外景必吸引不少途人和「姜糖」圍觀。上周六晚近11點，劇組回到拍攝首日的油麻地茶餐廳為姜濤和毛姐補戲，為避免劇情曝光，工作人員以黑布圍封拍攝現場。穿黑色衛衣、頭紮辮仔的姜濤一現身即被「姜糖」們包圍及舉機拍攝，他在工作人員護送下急步走入茶餐廳；大約拍了半小時，毛姐率先離開。

姜仔好錫「姜糖」
在茶餐廳內等車收工的姜濤心情特別愉快，不時走出舖頭同工作人員吹水之餘，又忽然在店內郁手郁腳嘟晒嘴跳舞。直至7人車駛到茶餐廳門口，劇組煞有介事地舉起黑布擋鏡頭，一班粉絲即跑到另一邊追偶像；在短短10秒的路程，姜濤不但獲多個工作人員掩護，仲開行大雨傘遮靚仔樣，認真誇張！不過姜濤好識做，明白Fans等咁耐都只為見佢一面，跟工作人員說：「唔緊要啦！」，示意不用開雨傘遮擋，工作人員即收回雨傘，再由女助手捉實姜濤手臂急急上保姆車離開！