滕麗名唔想消費魏駿傑 鼓勵對方開心面對人生高低

滕麗名、劉丹、呂慧儀、湯盈盈等今日在將軍澳電視城出席TVB處境劇《愛·回家之開心速遞》慶中秋活動，滕麗名表示中秋節要開工，但收工可以與大班朋友賞月，她開心地說：「每年都要老公準備四黃白蓮蓉月餅畀我食，朋友負責買兔仔燈籠，我因為開工時間唔穩定，剩係負責食同玩。」她憶述兒時玩燈籠的難忘事：「細個好曳會玩煲蠟，有次表妹玩燈籠時燒着咗件風褸，令手部受傷，大家玩燈籠真係要特別小心。」

提到舊愛魏駿傑最近接受訪問，提及在低潮期想過輕生，阿滕指撒瑪利亞會好重要。談到魏駿傑經歷離婚、零收入及照顧女兒等問題，壓力很大，會否覺得對方好慘？她說：「人生有高低潮，要開心面對，小朋友成長環境係大人製造出嚟，我知道佢即將演出舞台劇，祝佢演出成功。」會否捧場？她稱未知要否開工。另外，魏駿傑又指當年北上發展，有30%是因為她，指阿滕愈來愈紅，覺得自己配不起，阿滕笑笑口說：「唔好再講喇，以免話消費佢，大家都冇聯絡。」魏駿傑表示見到她幸福，也替她開心，阿滕說：「多謝！」