張致恆疑賽前減重失敗求對手遷就　大J拒妥協：唔到磅要罰錢

張致恆（Steven）與知名Youtuber大J將於鍾培生主辦的《培生擂台：無敵盃2021 WE ARE CHAMPS 2021》上對戰，賽事於本月18日開打，掀起不少話題。距離比賽不足十日，日前大J在其網上頻道大爆收到大會的聯絡，向他查詢能否臨時調高原先合約的70KG對賽體重，原因懷疑與對手未能成功減磅有關，大J因此感到不滿。

大J上載為比賽操練片段，見他已瘦到肚腩位只得層皮，又操到損手爛腳，為賽事增強體能及打拳擊技巧，他指自己在過去五個半月的籌備，每周會用四至五日的時間訓練，他的體重一直維持在70KG左右。不過他透露近日收到大會聯絡：「早幾日我收到大會通知，問我可唔可以將合約上嘅體重、原本70KG體重，問我可唔可以調高，我諗係9成9因為我對手疏於訓練同練習，冇將體重降到70KG，其實我哋係有五個半月嘅時間去準備呢場拳賽，佢當時報稱自己係81KG，有五個半月嘅時間，絕對夠可以降落去70KG，而家大會問我可唔可以將個體重調高嚟到打，即係佢唔到磅啦，佢唔到磅一來佢要罰錢啦！」雖然大J沒有提及對手的名字，但明顯是指Steven。

由於要到賽前一日才知道雙方的真實體重，但大J強調自己絕不會妥協：「我絕對唔會妥協，我要配合佢，將我嘅體重調高嚟同佢打，我係唔會囉，因為最初合約寫明係70KG，就係70KG，我絕對唔會配合佢呢樣嘢。」不少網民對大J的堅持，大表認同：「自己有血有汗、辛辛苦苦捱番嚟，點解反而要勤力嗰個退一步。」、「減唔到咪受罰囉，唔應該就佢，唔係做乜要簽合約。」而Steven於三日前貼出新相為實事倒數，對比起幾個月前的確有瘦了少許。