Fans為毛孩籌六位數賀26歲生日 Jeremy自認宅男「佛系」等對象

明天（8日）是MIRROR成員Jeremy（李駿傑）的26歲生日，碰巧他今日有活動要出席，現場即吸引大批Unicorn（Jeremy粉絲暱稱）到場支持！Fans大唱生日歌，又表示：「李駿傑！25+1，生日快樂！」。問到Jeremy正日生日有咩活動？他指：「都係喺工作中渡過，不過可以開工過生日好開心，相信MIRROR都會送個蛋糕仔畀我。」

提到一班Unicorn為他舉行連串慶生活動，包括廣告版、慈善義賣活動、相畫展及Cafe，Jeremy表示：「上年生日大家買廣告燈箱，我已經好感動，覺得好開心，今年仲多咗好多粉絲鍾意同支持我。希望大家將啲錢用嚟做善事，因為我今年初領養咗隻貓『Nana』，Fans仲籌得超過六位數去幫小動物，好Surprise大家咁愛護毛孩。」

談到可會現身相展給粉絲驚喜？Jeremy說：「昨日去咗打卡，睇到場地佈置好有心思，感覺到大家嘅愛，我覺得自己要做得更加好，先報答到佢哋。」對於生日願望，Jeremy希望疫情盡快過去，因為好想去旅行。一直單身的Jeremy亦被問到恨唔恨拍拖，他表示隨緣：「我覺得拍拖好講求緣份，但我自己成日『宅』喺屋企，比較難接觸其他人。（擇偶條件？）笑得靚嘅女仔，同埋要鍾意『Nana』，亦唔抗拒圈中人，隨緣啦！遇到一個人已經好好，想專注事業先。」