【獨家】老公做「阿四」任佢點 湛琪清懷孕五個月享受做女王
2021-09-06 01:06 
汪詩詩表妹湛琪清（Jessica）2019年下嫁潘廸生外甥金承威，享受咗兩年二人世界，Jessica現已懷孕5個月。準媽咪心情既緊張又興奮，尤其享受奉旨做女王，她開心說：「𠵱家我想食乜就會叫老公入廚房幫我拎，奶奶叮囑我唔可以攞重嘢，出街買嘢又係由佢攞，我反而變得好輕鬆呀！」採訪：方騫平 攝影：葉君海 場地：Lobster Bar@港島香格里拉酒店
湛琪清係個開心孕婦，懷孕後全家人都錫到佢燶，過住女王嘅生活！連大牀都霸咗大半張，老公為免反瞓撞到佢要靠邊瞓！她笑說：「圓圓和詩詩傳授孕婦及產婦心得，如少食多餐，飲多啲水，戒酒戒咖啡戒海鮮，坐月坐得好將來能減少腰痛。至於奶奶落旨叫佢(老公)對我好啲，我好少見佢咁乖㗎！」
轉口味愛上菠蘿包
Jessica自爆大肚後都會有啲小脾氣：「有次同佢提咗十幾次話想食冬甩，點知佢竟然若無其事，最後由佢朋友代勞買畀我食；而初孕時易攰，佢唔知我辛苦安排咗好多飯局，我忍唔住好嚴肅同佢講『我好攰唔想出去！』嚇到佢打個突，好緊張同我Say sorry！哈！但平時我唔係咁嘅。」Jessica為金家開枝散葉，問到奶奶送乜做獎勵？她強調：「佢會煲湯、買有機菜同埋買菠蘿包畀我食，自從有咗之後口味有改變，特別鍾意食甜嘢，特別係舊式餅鋪嘅菠蘿包，日日都想食，有菠蘿包食我經已好滿足喇。」
關鍵字
最新回應