【獨家】Dusty Bottle拆夥女主音單飛 Kerryta狂野形象惹「收兵」傳聞
2021-08-13 23:30Video Player is loading.
環球唱片曾力捧的5人樂隊Dusty Bottle於去年11月以私人理由宣佈解散。唱片公司睇中女主音Kerryta擁有一把磁性聲音，仲好唱得，加埋41吋長腿，安排單飛再出道，推出首支個人作品《心野》，以神秘野性姿態再玩過。採訪：方騫平 攝影：梁志明 場地：Mi Fit Studio@上環德輔道中
Kerryta雖然有得留低，但都要適應期：「因為今次係首次solo出歌，仲換晒製作班底，對我嚟講係一個新嘗試。以前我較依賴班兄弟，尤其我講嘢唔叻，做訪問時我講得唔好，靠佢哋嚟搭夠，𠵱家就要獨力承受！呢個都係學習嘅過程嚟。即使分開咗，今次出歌佢哋都有畀意見，話鍾意我首歌。」她承認，跟作戰兩年多嘅隊友建立咗感情，決定分開會唔開心，亦曾擔心前路，但做人要勇於生存，好彩最後唱片公司都支持她Solo。
覺得葉巧琳好Sexy
提到新歌歌詞內容以女性角度出發，對於「女追男」，Kerryta坦承會主動出擊，卻否認如傳聞中愛「收兵」：「謠言止於智者，證明公司成功打造到我喺《心野》MV入面嘅狂野形象，呢方面我身邊朋友都好明白，男朋友更加安慰返我。」MV中她和男主角有肌膚之親，感覺上帶有挑逗性：「我怕尷尬，同導演商討，頭髮以上唔可以掂。」Kerryta讚自己鎖骨位最性感，突顯咗平日有做運動嘅女人線條美，而她眼中《全民造星III》葉巧琳（Mischa）有性感美，另外，Kerryta想走多元化歌路。
關鍵字
最新回應