【獨家】喜見學妹何詩蓓創歷史 司徒鈺芸周身傷痕唔後悔做打女

曾獲美國「武打影星傑出表現獎」的打女司徒鈺芸（原名陳鈺芸JuJu）是前香港ITF跆拳道代表運動員，對於香港運動員喺東京奧運滿載而歸，共取得1金2銀3銅破紀錄佳績，JuJu好興奮！最開心見到聖保祿師妹，游泳選手何詩蓓歷史性贏得兩面奧運銀牌。採訪：方騫平

何詩蓓為香港體壇寫下歷史性新一頁，學姐司徒鈺芸勁開心：「校友、所有老師、同學都非常感動！尤其讀書時候兼顧運動唔容易，好需要有紀律同決心，希望今次香港運動員能激發到更多年輕人追求體育上嘅理想，同埋各界對體壇發展嘅支持！」

撞爆額頭用膠布黐住就算
　　JuJu之前去咗泰國3個月拍《五行剌客》電影版《復仇之拳》，她今次由頭打到尾，是全片唯一女星。而拍攝期間她傷完額頭再扭傷腳，禍不單行：「因為打鬥動作太大，而攝影機同我相距好近，我郁動嘅時候，個頭撞咗落部steady cam前面舊鐵度，傷口喺正額頭正中位，有1寸長，而且都幾深，即血流披面，本來要去醫院縫針，但我唔想去醫院，最後由護士過嚟用埋口膠布黐住，好返後做激光去疤。」而她負傷繼續開工，再不慎「拗柴」，足踝要敷冰消腫，再用止痛噴霧頂住埋位再打過：「其實拍動作戲發生意外好常見，當日拍《臥虎藏龍：清明寶劍》眼睛都受過傷啦！」