美國隊長貼引體上升片賀壽 「雷神」收仔女親整蛋糕甜到漏

本周三(11日)係「雷神」Christopher Hemsworth嘅38歲牛一，生日前夕，美國隊長Chris Evans已出片賀老友，片中嘅「雷神」用兩個吊環做引體上升，佢好黐線，邊做邊傾偈，做做吓仲要單手做，完全面不改容，之後仲有人掟咗個雷神之鎚畀佢拎住嚟做，好搞笑。美國隊長仲要連出三個Po，睇嚟兩個真係好Friend。

老友就貼片賀壽，「雷神」家人就整蛋糕同佢慶祝，更強調係仔女整畀佢，壽星話成功吞咗75%，成肚都係甜到漏嘅喜悅。細心睇個蛋糕，有一個人型物體，應該係「雷神」嚟嘅，佢企喺好似海嘅物體，雖然成個蛋糕被風吹過咁，但心意搭夠，生日快樂呀「雷神」。