周潤發獲頒浸大榮譽博士 笑談當年拍劇見鄭裕玲多過見媽媽

周潤發在致謝辭時感謝浸會大學頒給他榮譽博士學位，說：「講到讀大學，媽媽很就有遠見，60年代就帶我飄洋過海出到香港，讀香港社會大學。當時我10歲。六十年代的香港好簡陋，一家人住喺一間舊唐樓，一間屋住咗三十幾人，我、家姐、細妹、外婆瞓張碌架床嚮廳，環境好惡劣，對我一個鄉下仔來講，壓迫感好大，所以我成日去睇五點半公餘埸！其實套戲做乜我唔知，我只係鍾意歎冷氣。」後來他去報讀邵逸夫爵士開辦的TVB大學，一年後畢業開始拍劇，每日不停講對白，指當時見鄭裕玲還多過見媽媽。

周潤發其後進軍影壇，拍攝不少經典電影，「86年拍咗吳宇森導演的《英雄本色》，打後10年嚮槍林彈雨下過，我可以講，我開槍用嘅子彈，多過當年一哥。94年我學人哋去浸鹹水，去咗南加州大學，辛苦㗎，因為唔會講英文。兩年之後，好好彩有機會拍到第一部西片，對白唔多，老規矩，揸番槍。」又幽默指對自己在荷里活的發展是「節哀順變」。
周潤發最後以「有趣」來總結自己的電影生涯，「我覺得我嘅電影行業好有趣，由廣東話轉ABC再講JIQIXI，其實係迫出嚟，嗰時要搵食，嚮片場百幾甚至幾百人等住你，冇得做唔到。當然，香港人畀咗我好多鼓勵、包容，愛錫！仲有好多謝香港呢個地方，賦予我智慧同愛我，要多謝香港這個地方、香港人，多謝各位。」