【獨家】兩公婆掛住傾電話阿仔四圍走　車婉婉𠱁4歲BBQ收玩具返歸

車婉婉於2017年以42歲高齡，為中澳混血老公Jonathon誕下混血B仔Justus（BBQ），可能一直採取「放養教育」的關係，4歲BBQ不時都撞到周身瘀傷，繼早前仆到眼角流血後，近日又暴曬到塊面又紅又腫，肉痛到婉婉也自言「要打自己三百巴掌」。日前，一家三口現身銅鑼灣，兩公婆掛住講電話，而BBQ就自己周圍走，睇實啲好喎！採訪：梁志明

當日晚上7時許，車婉婉與兩父子Jonathon和BBQ現身利園二期，孭住超大Tote bag的她拎住部手機，由走廊傾到入玩具店，兩公婆亦非常有默契，大約5分鐘後婉婉一收線，Jonathon的手機就響起。二人輪流煲電話粥，BBQ全程一個人跑來跑去，又自己揀玩具，相當獨立。其間，BBQ睇中一件小玩具，仲攞畀媽咪過目，但婉婉卻對填色簿較感興趣，最後二人乜都冇買便離開，臨走她更教囝囝禮貌地向職員哥哥Say goodbye，遭撇甩的Jonathon即趕緊收線，跟上妻兒腳步。

好手尾的小朋友
接着3人走進另一間玩具店，BBQ手捧住一個玩具榨汁機，跟隨店員姐姐放到小桌上，並將手揸的一個超人Lego模型仔展示給姐姐看，十分可愛。兜了一圈，婉婉便回到囝囝身邊坐低陪玩，並耐心協助對方將榨汁機中的「生果」倒進杯子中；見時間差不多，婉婉本來想叫囝囝將玩具「歸位」，怎料BBQ未玩夠，扯番低媽咪再陪玩公仔。之後婉婉開始同囝囝講道理，BBQ繞晒手又向職員發表偉論，鬼馬的婉婉即將頂粉紅色蝴蝶帽笠在囝囝頭上，BBQ即除低幫媽咪戴。最後玩到7點半，BBQ終於聽話收拾好玩具，跟爹哋媽咪離開。