【好腳頭】月中「升呢」爺爺 喬寶寶返蘇格蘭前赴美登台掘金兼逗利是

喺今個月中「升呢」做爺爺嘅喬寶寶，孫BB真好好腳頭，之前他留港兩個多月賺錢，返英國蘇格蘭抱孫前再走多轉掘金，轉飛美國RENO PEPPERMILL演出一場talk Show，當晚吸引咗唔少華人客捧場。生鬼嘅喬寶寶唔止唱出多首串燒「飲歌」，仲大搞爛Gag，自爆讀書時媾女同學及盲婚啞嫁，同老媽子睇相揀老婆趣事，觀眾睇得相當enjoy，笑聲、歡呼聲不絕，開心到係咁畀利是，利是數量多到成個紙袋都塞到滿，利是入面內容有5、10、20、100蚊美金，寶寶show後加插拆利是，拆足幾粒鐘嘅開心情節，真係勁興奮。收入咁可觀，返到屋企會識做地「醒」老婆、兩個囝囝、新抱及內孫厚禮。

當晚他一上台即搞笑熱身：「今晚有遊戲、唱歌、送禮，仲有親筆簽名相，親筆簽名相香港仲未有得炒住㗎！」惹來全場歡笑聲。他又多謝咁多華人喺疫情下都嚟支持他。

搞爛gag觀眾笑到拍爛手掌

提到中學點滴，他自爆學校有兩個香港女同學：「我見到有個靚女好似關芝琳咁非常靚，我以前都好畀心機讀書同打波，但見到佢之後經已墮入情網，每日會問佢借間尺、擦子膠、鉛筆...搞到佢舉手話畀老師聽我騷擾佢，阿Sir叫咗我坐去最前，但咁樣阻止唔到我去媾佢，翌日我擺咗塊鏡同埋本書去望住佢。每次放學時候我會跟住佢，哈！其實我想佢安全，因為其他同學都好想媾佢。我仲嗌阿媽子早一個鐘頭嗌我起身，我阿媽好開心，以為個仔好畀心機讀書。」

他續說媾女技倆：「其實我去到佢屋企樓下，見到佢背面經已好開心，搭地鐵佢喺A閘出，我就喺B閘出，然後行快兩步扮綁鞋帶，扮有緣相遇，但久而久之佢覺得我好煩，轉第二個出口走，但我都照樣走去另一個出口，然後跑過去跟住佢...佢忍唔住話：『可唔可以轉個藉口？』於是我就扮執返起跌咗落地本書。我最開心係落雨天，我落湯雞喺佢面前出現，佢好無奈話：『不如我遮埋你啦！』我最開心舉傘時我膊頭擦到佢膊頭...佢話：『我哋唔好黐得咁埋呀！我哋仲喺同學嚟咋！』」

唔揀百萬「肥西施」怕被砸親

另外，台上女司儀知道他跟老婆盲婚啞嫁結婚，但兩人honey前darling後，問到點樣Keep住咁好關係呢？寶寶大笑說：「我係印度韋小寶。身邊有好多女士們，所以唔記得老婆叫乜名，惟有叫佢honey同darling。如果老婆成日聽到個老公咁樣叫喚，快啲問返個老公自己叫乜名！我哋印度人係一夫一妻制，但女朋友唔計！」此語一出惹來全場歡呼聲及尖叫聲。他又大談當日睇相揀老婆笑料，因為其中一個被喻為百萬富婆英國印度西施，但年齡方面較他大10年！他即耍手擰頭：「我話帶我老婆出街時，都唔知話畀人聽，佢係我老婆定係我阿媽呀？同埋佢體重比較肥，我恐怕洞房時佢會砸親我！因為我鍾意玩女上男下嘅！」