Odi約打友誼波Keep住團火 關嘉敏為拍劇多做運動訓媡

奧運期間一班歌手藝人都響應全民運動，約埋一齊打返場友誼波。當日出席有陳善渝（Odi）、關嘉敏（Carman）、鄧穎芝、李逸朗、張彥博同《全民造星》鄧禮迪，雖然大家都係應不同朋友邀約，但一見面即雞啄唔斷。

問到Odi現場打波邊個最勁？她說：「男嘅阿迪，又高大靚仔射波又準；女嘅就一定係Van仔（鄧穎芝），佢好搏命，又同男仔打開，之前睇佢打MMA就知佢係快狠準。自己就好耐無打波喇，都係最近先同Gordon和同事打返，而且最近拍完《盛．舞者》先多返啲時間，希望可以keep住團火，因為一齊認真打好場波其實好熱血、好開心。」

Carman則自爆：「我完全唔識打籃球，都係試過落球場射下波，好似一直同呢項運動無乜緣分。但我啱啱完咗《盛．舞者》，嚟緊就要拍劇喇，希望可以同大家打多啲波，訓練下自己；亦希望大家唔好嫌棄我呢個BB班啦！」

問到張彥博何以保持超級童顏？他笑言 :「我都真係無特別去保養，可能我個人鍾意做運動掛。」李逸朗最近就忙拍攝內地電視劇，剛返港可以小休一下。