【獨家】熊黛林短暫回港接力湊女　郭可頌約黎淑賢老公歎雪茄

久未在港露面的熊黛林（Lynn）月初現身公開活動時，自爆在內地逗留了半年拍電影和電視劇，此趟回港休息兩個月後會再北上開工。事業心重的她狂接Job，連孖女Kaylor與Lyvia的3歲生日都冇得一齊過，老公郭可頌也投訴老婆離港又密又耐！一對寶貝女下月幼稚園開學，難得Lynn返嚟幫手湊女，重獲自由的郭可頌日前即約黎淑賢的美容醫生老公許智政（Angus）去銅鑼灣Men's Talk、歎雪茄。採訪：梁志明

自從生咗孖女後，熊黛林上圍都升呢34C，「幸福人夫」郭可頌見到索爆老婆也熱情得多，惜狀態大勇的Lynn近來密密北上搵銀，留下一對寶貝女畀老公湊。Lynn近日終於回港接力照顧囡囡，郭可頌也把握短短的兩個月時間，相約好友出街呼吸「自由」的氣息！日前下午3時許，《頭條日報》記者見到郭可頌與黎淑賢老公許智政在利園三期西餐廳BELGOS飲嘢吹水。

兩個鐘Talk show
其間兩位人夫好識歎，各自叫了一杯Gin Tonic和紅酒，坐在戶外一邊摸住酒杯底傾偈、一邊食雪茄。估計郭可頌好耐冇見人，當日幾乎全程也是「有佢講冇人講」，瘋狂盡訴心中情，還不時肉緊郁晒手，而Angus就充當聆聽者，間中搭兩句嘴，唔知有冇呻吓家事呢？講講吓仲忽然大聲笑；全程吹足兩小時，郭可頌由頭帶到落尾，完全冇Dead air，但Angus可能聽到有啲攰，開始攞部手機出嚟上網睇吓名錶。飲咗成杯Gin Tonic落肚的郭可頌，戴番個口罩、除埋副超去完廁所再埋單走人。