收通知信以為遇騙案　林嘉欣獲法國政府授勳

曾留學法國的林嘉欣對當地文化非常熱衷，今年是她擔任「法國五月藝術節」大使的第8個年頭，即使因疫情只能留在香港，嘉欣仍堅守大使使命，積極推廣法國各種藝術文化，日前更獲法國政府授勳為「Chevalier de l’Ordre des Arts et des Lettres」，並在老公袁劍偉、兩個囡囡陪同下，到法國駐港領事官邸接受授勳。

嘉欣笑言去年4月收到授勳通知時，以為被整蠱：「因為封信係由加拿大政府發出，我睇咗好多次，仲問我先生『係咪呃人㗎？疫情仲有呢啲騙案？』後來先知，原來因為我喺加拿大出世，法國嗰邊要認證我嘅國籍，所以封信由加拿大寄出。」

授勳當日，嘉欣除以法文致辭外，更安排兩個囡囡協助法國領事，進行授勳儀式，她說：「兩個囡囡負責托住個放有勳章嘅枕頭仔行出嚟，我同佢哋喺屋企綵排過，但屋企個枕頭大好多，哈哈，所以嚟到領事館，我哋都有綵排多一次，之前仲帶佢哋買過條新裙仔，因為我兩個囡囡好似野人，通山跑，平日着嘅衫穿晒窿，所以一定要帶佢哋去買衫。」