首合作外賣平台廣告被洗版阿Dee肉緊攬實古仔肥仔獻吻被嫌棄

2021-06-15 17:00

ERROR、古天樂、盧覓雪及Agent L.（《ERROR自肥企画》導演曹梓冲）為外賣平台合作拍攝廣告，廣告在昨日見街，而一眾ERROR成員都忍唔住「自肥」，在社交網上載與男神古仔的合照。隊長肥仔（梁業）留言：「我愛古天樂❤️估唔到我可以同佢合作，唔好講咁多攬咗先咀啖先」，不過古仔表情似乎有啲尷尬；阿Dee（何啟華）就表示是「有今生冇來世」，他更扮嘢問古仔可否攬攬，未待對方回答已即刻攬實，十分猴擒！

出雪櫃的保錡就似乎眼濕濕相當感觸，他感性道：「人生路上不能滿足所有人，但我能夠做到的是無愧於心。努力全力做好每件事，感恩有機會和古天樂拍攝🙏🏻🙏🏻🙏🏻🙏🏻🙏🏻🙏🏻🙏🏻🙏🏻🙏🏻」至於成員193（郭嘉駿）早在上月MIRROR尾場演唱會已成功與古仔影相，更獲對方搭膊頭，難怪唔使再次Po合照，因為係人都知佢咩料！