內地拍劇暈倒高處墮下 洪卓立曾昏迷危殆隻手冇晒血色

洪卓立早前到順德拍劇，更將愛犬「肥膏」暫時交給拍拖11年的前女友湯怡照顧。最新一期《東周刊》報道，仍在內地開工的洪卓立日前突然抽搐暈倒，更從高處墮下，昏迷超過10分鐘。口吐白泡的他，隨即被送到醫院急救，據悉醫生表示他情況一度危殆，幸好現時情況受控。

英皇經理人Mani（霍汶希）回應指：「多謝大家關心洪卓立的情況，現在他已回香港，在家裏休息中，亦都再去醫院全面檢查一次。報告有待回覆，暫時頭部檢查是正常的，現在因為膊頭落地，所以左手暫時不能舉起，要接受物理治療。他的確是一度昏迷，而且缺氧，我們已迅速將他送院。救傷車亦非常快的到達，當時有在車上進行急救，雖然有嘔吐，但已經在救傷車上甦醒，稍後我會叫他親自錄一段回覆給大家🙏🏻🙏🏻🙏🏻」

洪卓立錄音親自回應：「十分抱歉，多謝大家關心。我已返到香港，暫時無大礙，因為左邊膊頭落地，現時仍未舉得起左手，疫情過後我會再完成餘下戲份及其他工作。開心又唔開心，因為令助手、媽咪、導演及關心我嘅人擔心，多謝導演一直關注我情況，更留喺醫院過夜支持我。開心係發現身邊好多愛，朋友即刻問要唔要煲湯水畀我，又話可以介紹醫生，好暖心。今次作品演奸角，為Keep住狀態食得比較少，加上天氣熱，戲服又厚，仲有燈光照住，可能因為咁身體唔舒服。希望食多啲嘢，做多啲運動，盡快回復健康狀態。」

洪卓立曾於2009年因肺積水復發入院，當時有指他情況危殆，令「死訊」謠言在網上討論區瘋傳，搜尋其名字時更曾一度出現「洪卓立 死咗」關鍵字。