想同林二汶出合唱歌 Jer率先爆《調教你MIRROR》隊員零妝上鏡

林二汶與Mirror的阿Jer(柳應廷)昨晚擔任Chill GOODTV《Music Panda》節目的嘉賓，兩人分別獨唱及合唱多首歌，前者更挑戰Serrini《網絡安全隱患》，唱出另一種味道而被網民大讚，於留言區狂留MM7。節目全長1小時十多分鐘，有近萬fans捧場。

除了唱歌，兩人不時回應歌迷問題，二汶第一個就問：「咩係MM7，點解咁多人打MM7？」阿Jer就幫忙解畫:「係速成碼，係個『正』字囉。佢哋想打得快，依家就會用MM7代表個正字。」二汶話，「哦，原來係咁，多謝大家讚我哋正呀！哈哈」歌迷留言叫兩人下次試吓一齊做個史詩式跳舞live，二汶未被嚇倒，笑住話，「我從來都係一個dancer，我可以一字馬㗎。」而阿Jer最大心願係同二汶有合唱歌，跳舞都可以：「不過我排舞好麻煩，我記得比人地慢，所以經常排排吓會尖叫，記唔到停晒喺度㗎！我班隊員都已經習慣咗我，一排舞就會大叫，佢哋唔理我任由我叫......」對於Jer的願望，林二汶就幽默回應：「我願意」。

Jer又透露最近忙於拍新節目《調教你MIRROR》，「會有新一面俾大家睇，我哋全部都唔化妝，素顏上鏡。話晒係偶像組合，平時花姐都要我哋好靚仔，如果打扮差，花姐會鬧，今次攞正牌不用打扮，真面目示人都幾得意。」