落田做農夫體驗苦差施匡翹謝高晉蔣嘉瑩呼籲珍惜食物

2021-05-23 21:34

施匡翹(Zaina)、謝高晉、蔣嘉瑩(Vivian)日前為經理人公司嘅網上平台節目《職業試工隊》，到農場親身體驗做一日農夫，親手收割紅菜頭及椰菜。今次體驗過程殊不簡單，完全感受到每一片菜葉都係農夫嘅心血，故叮囑大家一定要珍惜食物。

拍攝當天相當炎熱，而且遇上滂沱大雨，幸好最後太陽伯伯出來了，在年青農夫Kelly指導下，三位客串「農夫」在烈日當空下分工合作，蔣嘉瑩負責除草、施匡翹負責施肥、謝高晉則負責捉蟲；完成農夫每日例行工序後，三位再到紅菜頭田及椰菜田收割收成物，十分興奮。

蔣嘉瑩開心表示學會好多農場知識，好似清除紅秋葵附近雜草，而且體會到農夫的艱辛；施匡翹則負責為潺菜施肥，初時大家都以為係用原始嘅「糞便」，點知改用咗混合花生麩及骨粉嘅有機肥料，一啲都唔臭，她更學會原來施肥唔可以直接灑喺菜度，否則有機會食到殘留物，影響味道。謝高晉則負責捉蟲，高晉笑言：「簡直同蟲蟲捉迷藏，佢哋好古惑，最困難喺啱啱落完大雨，蟲蟲會匿埋避雨，所以更加難搵，要仔細逐片菜葉翻開望。」