【頭條戲場】《複製人徐福》別因人性醜惡放棄追求良善

由孔劉及朴寶劍主演的《複製人徐福》，製作費高達165億韓圜（約1.14億港元），睇預告有飛車有爆破又有實驗室景，以為電影走荷里活式緊張刺激你追我避澎澎澎燒錢路線，原來李勇周導演借複製人議題探討生命延續的意義，金句處處意境亦高，估佢唔到。(上映中)撰文:廖思慧

患重病就快死的前特工閔奇憲 （孔劉飾） 接受了國家級機密任務，就係將史上第一個複製人徐福（朴寶劍飾）由研究所護送至安全地方。一直活在實驗室食藥丸大，思想得十歲、身懷長生不老秘密的徐褔，在奇憲的陪伴下首次踏進真實世界，行街市睇會游水嘅魚又去坐沙灘，冇表情但心裡應該幾開心，之後徐福同奇憲突然要面對四面八方的追殺，逃亡其間兩人探討生命同死亡，究竟人類被剝奪死亡的權利，會否讓生命變得不再有意義而失去價值呢？

電影評價好兩極，有人睇到入晒神，有人睇到恰晒眼瞓，我睇嗰場身旁位電影人瞓得好安詳。電影介紹為科幻動作電影，動作場面其實佔好少比例，由頭到尾都係一剖探討生命及死亡的電影，總之節奏好慢，偶然彈一啲對話會令你腦洞大開發，如不死人寶劍知道孔劉有重病就問就嚟死嘅佢有咩感覺?孔劉答得老實，「有時候好，有時候唔好，好多時其實爛到透，雖然係咁但都仲想活着，同埋都驚死。」


李勇周導演表示從中國古代秦朝的臣子徐福為秦始皇尋覓長生不老藥的故事獲得靈感，就創作咗一部關於擁有不死之身的複製人與時日無多的男子的公路電影。導演說：「我想描寫兩個男子面臨截然相反的極端處境，卻一同步上驚險旅途，克服對死亡的恐懼，戰勝人類宿命，正視生命的過程。」