【維港會】舊同事夫婦平賣樓後抑鬱要食藥兼離婚 網民:日夜望住間屋

置業是人生大事，如歌詞所道「落錯車，如離開了幸福的高速路，誰又保證我明天將更好」。有網民在網上討論區「親子王國」發文，指育有一個小朋友的舊同事夫婦自從約2009年前後賣樓「落錯車」後，因為租金高企以及租約期滿，導致身心俱疲更患上抑鬱症，最後還離婚收場。

網民指，舊同事於十多年前「上車」買了人生第一層樓，180多萬元的新界三房單位，剛巧碰上升浪，2年後以300多萬元沽出，「佢當時話老公睇會跌，再跌先買返，之後樓市發展係點，我相信大家都好请楚」。

網民透露，「自沽樓後租屋，舊同事搬咗4、5次屋，身心俱疲，多數比人趕走或完約唔租，期間，佢同老公都先後有抑鬱症，要食藥控制住，到現在，佢兩公婆成日都覺得，樓市總會有海嘯價，每日都望樓市跌」。

發文者慨嘆，舊同事「為咗層樓患上抑鬱」，覺得對方「可能過唔到自己心理關口，平賣貴買」、「業主變租客，仲要日日夜夜望住間屋，簡直心如刀割」。

有網民認為，「我永遠一句: 自住樓永不會賣，如果賣，只可以係換樓。自住樓不是投資工具」，也有人認為當事人心理承受能力太低「我淨係想講，十幾年搬咗4、5次屋就兩公婆都患上抑鬱症，如果抗壓能力咁低，可以生存到依家都係奇蹟！」，也有人認為「其實佢地個case 都唔係最差，都叫有錢賺，好過97年貴買咗，04年平賣咗，帳面都唔見一半呀。」

不少網民都感同身受，「我身邊都有三組呢種人，就係200萬摟下買咗，幾年後各種原因落咗車，但三组都係3/4年前上返車，衣家計落呢幾年都賺咗40-50%。反而由一開始已經等跌多啲上車果啲(即係從來冇成功買到摟果啲)，就真係越嚟越灰」、「我都有兩個舊同事同樓有關嘅故事，兩個都係兩公婆，第一個199x在港島買咗層樓，老公睇升，老婆睇跌，最後賣咗，好似係1997左右，賣左後幾個月升咗一百萬，當時一百萬已經好多，兩公婆因而經常吵架，最後離咗婚。第二個三百幾萬賣咗將軍澳樓，今日九百萬，租咗十幾年樓上唔返車。」、「我都識人廿幾年前買咗大型屋苑, 之後仲買多個單位, 持貨幾年, 賣晒兩個單位賺咗舊錢租屋住, 諗住跌時再入貨, 點知一路上唔返車, 又係周圍搬, 但兩公婆又好樂觀, 3年前感覺上車無望, 在外國買咗樓。」

帖文轉載自《為咗層樓患上抑鬱？》