【世盃外】祖達C朗連環士哥葡萄牙3：1反勝盧森堡

2021-03-31 09:40

世界盃歐洲區外圍賽A組賽事，葡萄牙作客憑藉迪亞高祖達、C朗拿度及祖奧包連夏各建一功，以3：1反勝對手，賽後三戰七分升上小組首位。

盧森堡上場爆冷作客1：0贏愛爾蘭，十三年來首次作客贏波，今場主場鬥葡萄牙也有驚喜，開賽三十分鐘已經有基輔戴拿模球員謝遜洛迪古斯飛身頭槌頂入領先。葡萄牙及後有祖奧菲歷斯四十分鐘傷出，換入的狼隊球員柏度尼圖補時助攻，迪亞高祖達頂入半場追平。

換邊後葡萄牙重拾主導形容，五十分鐘C朗禁區內彈射建功，加上末段柏度尼圖再助攻祖奧包連夏頭槌埋齋，鎖定3：1勝局。同日，塞爾維亞作客2：1贏阿塞拜疆，塞軍與葡軍同樣三戰七分，惟葡萄牙以較佳得失球升上第一位。

今場賽事也有插曲，C朗拿度在七十八分鐘截到對手錯誤回傳單刀，但是他埋門時操之過急射向龍門身體錯失入球良機，事後成為球迷網上瘋傳熱話。另外，他在對陣塞爾維亞時擲走的隊長臂章被場地工人拾起，現時正被當地人拍賣，籌款幫助當地六歲兒童做脊髓手術。