【維港會】丈夫呻食足5日蒸水蛋 港媽即黑面罷工3日

媽媽煮飯雖然好辛苦，不過如果連續幾晚餐餐煮同一樣餸，就可能令家人食到厭！

近日在香港，一名網民以「阿爸講咗句日日食同一樣嘢有啲悶，阿媽就發脾氣唔煮飯…… 」為題發文，表示媽媽煮飯有一個習慣，會在某段時期將喜歡的餸菜連續煮幾日。譬如某天豬肉價格便宜，便會煮梅菜肉餅，然後接連幾日再繼續煮梅菜肉餅，「直到佢諗到有乜其他嘢可以煮為止」。

直至前幾日，網民指媽媽已連續5日蒸水蛋，結果爸爸卒之忍不住開口說了一句：「吓又水蛋呀？」媽媽聽見之後馬上黑面，翌日更表示買不到餸，所以不煮飯。「結果呢幾日佢都無煮，我已經食咗三日外賣啦。」苦無辦法的他決定在網上發文，向一眾網民尋求意見：「點先可以哄番阿媽？」

不少人對此既表示同情，又感到無奈，「我通常有得食就食，不多言，不批評，好味就讚吓」、「叫你老竇氹番佢囉」、「幾日食同一樣嘢，我會話，不如出街食啲好嘢！大家有乜好提議，提議完之後，阿媽就會自動自覺轉餐牌」、「諗整乜餸都好煩的」。