【獨家】愈「宅」愈瘦冇晒身材　泳兒掃烏冬薯片谷肥自己

個個都因為Stay home抗疫肥，唯獨疫情下令工作大受打擊的泳兒，雖然成日匿喺屋企玩煮飯仔，但卻愈「宅」愈瘦，早前仲自爆瘦到要改衫！以為私下佢一定食得好少又好清淡，日前《頭條日報》記者於銅鑼灣撞到泳兒，當日佢同友人買完蛋糕又去超市買烏冬，臨走前仲掃咗幾包松露薯片，睇嚟佢增肥意慾都幾強。採訪：梁志明

當日晚上約7時，泳兒與女友人現身希慎廣場地下睇護膚品，惜兩人兜咗一圈都冇嘢揀啱，隨後直接到底層MARKET PLACE買嘢食。其間，友人在雪櫃挑選冷藏食品時，泳兒都好貼心，一路手腳並用幫對方頂住度門；及後去睇麵食，她與友人各自拎一包上手研究，最終望咗半分鐘．泳兒先擸走一包$12.9的讚岐烏冬，認真精打細算。

薯片都幾貴
畀完錢後，本身已抽住一袋CACAO SAMPAKA蛋糕的泳兒好為食，與友人會合另一男性好友後，便一齊到上層買$69一包的新加坡頂級純手工松露薯片。最後，滿載而歸的他們返回地面，男友人飲完嘢翹埋雙手企一邊，兩位女士就在旁忙着撳手機App Call車，大概等了10分鐘，眾人便登上座駕離開。