【獨家】為抽40萬車再買嘢換抽獎券 鄧梓峰同孖仔商場上上落落

因為疫情關係，做開司儀嘅鄧梓峰停咗好多Job，創辦嘅「梓峰教育」亦因禁聚令而關閉，冇乜嘢做就爭取時間親子樂，日前就見到佢同高過佢嘅孖仔Matthew(鄧柏暉)及Justin(鄧松暉)去又一城行街，買完嘢仲去咗填抽獎券，得知大獎係一架40萬嘅車，為咗多一個機會，仲即刻補飛買多幾樣嘢湊夠錢再換抽獎券。採訪:譚壹致

鄧梓峰的一對孖仔一直在美國波士頓大學升學，每年都會趁假期回港陪父母，已22歲嘅兩人日前就陪老竇去行街，買咗衫又買咗日用品，湊夠數就去換抽獎券，頭獎係一架379,800港元嘅Honda。

三父子玩抽獎
記者發現三父子喺抽獎區默默填抽獎券，呢種填唔係用筆填，係用App填，搞搞吓三父子突然搭自動電梯去咗下層嘅日本連鎖服裝店行咗個圈，揀咗一陣就買咗保暖褲及保暖衫，然後三人又上返去抽獎區再換卷，其間兩個仔又唔知行咗去邊，鄧梓峰就企正路中心係咁撳電話入啲抽獎資料，見佢撳到皺晒眉，狀甚苦惱，搞足十幾分鐘終於完事，三父子終於可以離開，抽獎結果應該已揭曉，唔知佢哋夠唔夠Lucky呢?