【UA結業】不滿政府幾次「一刀切」封處所 霍啟剛鬧抗疫不力搞死戲院

今早（8日）有36年歷史的UA戲院在官網表示因受疫情衝擊及經營壓力，「遺憾地宣佈於即日起全線結業」正式向影迷告別，並指結束自1985年起、在港36年的業務，形容「這絕對是一個痛心及艱難的決定」，並向長期支持的顧客致歉，感謝每位顧客、同事和合作夥伴過去的鼓勵和支持，而據知戲院已啟動清盤程序。

一向關注時事的霍啟剛也是戲迷，經常同老婆郭晶晶拍拖睇戲，對UA結業大感惋惜，並希望政府汲取抗疫經驗，不要再一刀切關閉處所。他在社交網轉載相關報道，並留言：「屹立香港多年，UA戲院喺香港開創咗唔少先河：引入迷你戲院、引入IMAX... 帶俾香港人唔少嘅新體驗，陪伴着我哋成長，全線結業真係好可惜。雖然戲院近日可以重開，但過去一年喺政府數度『一刀切』關閉處所下，捱到依家已經好了不起。天災我哋避唔過，但係政府嘅抗疫手段，直接將業界推向瀕臨結業嘅邊緣。業界期望唔係政府幫手交租出糧，只係好卑微地要求有個相對正常穩定嘅經營空間；當整個行業最無助時，業界努力尋求同政府溝通，可惜換來嘅係一個又一個筆友式的冷漠回覆。UA院線結業，象徵一個時代的逝去，政府應汲取抗疫經驗，唔好再一刀切關閉處所，喺抗疫同經濟發展間作出平衡！#戲院 #UA戲院 #IMAX」。