【獨家】拍檔踢爆「瞞孕」拍《五星II》　沈卓盈佗B開工仆親激嬲老公

沈卓盈（Jess）和鄺芷凡（Omi）及新加入的「女神經」梁諾妍（Inez）為香港開電視節目《五星級絲打II》擔任主持。後兩者唔覺意踢爆大肚Jess拍攝時着高踭鞋跑上跑落，仲試過被地毯Kick到雙膝撞落地，嚇到老公喝令佢唔准再出街！講到《五》節目超旺丁，上輯主持倪晨曦和Jess先後大肚，自言隨時「閃生」的Inez即被爆趁機睇酒席，仲睇到流哂口水！撰文、攝影：黎寶倫　 化妝：Phoebe Y@PhoebeYImage（沈卓盈）、Chris（梁諾妍）　髪型：Eas Fu @ AdmiX Hair Styling（沈卓盈）、jackal @HAiR（梁諾妍）　服裝：tout a coup（梁諾妍）　場地提供：Mini Central

36歲的沈卓盈與商人老公杜灝標結婚兩年，今年元旦宣佈造人成功！目前佗B約7個月的Jess早前瞞孕拍《五星級絲打II》，鄺芷凡和梁諾妍大爆：「佢唔想我哋Extra take care佢，驚麻煩到我哋，所以佢冇同我哋講，如果知道就會叫佢小心啲，佢成日着對好高嘅高踭鞋行嚟行去，早幾日膝頭哥仲撞咗落地，瘀晒，好危險！」問老公可有擔心？Jess嬌嗔：「佢聽到都嚇死，叫我唔好岀街，邊度都唔好去，但俾地毯Kick親唔關我事㗎嘛，以後會加倍小心。」

大肚易攰
提到介紹了不少酒店及美酒佳餚，大肚的Jess卻未能盡情享受，Inez笑言生冷及最高級的美食都由她「頂」，Omi補充：「佢食得嘅我哋都畀佢大快朵頤，平時拍嘢只係食兩啖，但今次佢食晒，食飽就瞓，令我哋都好懷疑佢大肚。」Jess坦言因妊娠反應，令她拍攝時好易攰、飆汗又嘔，搞到卡都冇力打，「嗰時好餓，但又諗唔到食乜，好糾結。」向來嗜甜的她更忽然抗拒甜品，轉食Pizza、薯條，令好友陳凱琳猜測今胎是B仔，Jess故作神秘：「我知BB性別，但想畀大家估吓，仔女都冇所謂，最緊要健康。」

隨時閃生
對於《五》非常旺丁，問被批奉子成婚的Inez會否是下一個？她即射波：「Omi加油呀！（Omi：佢已經睇晒新房、婚宴場地，仲流哂口水，應該Ready喇！）冇呀！我年紀Ready囉，又唔驚大肚嘅。（期待？）有就嚟㗎喇，話唔定真係閃生。」Jess即笑稱要對親家，那麼跟洪永城幾時結婚？Inez說：「冇特別計劃，我哋都順其自然、玩即興嘅，而家向住呢個方向進發。」