【獨家】以執導新作發放正能量　趙善恆同周國賢操出男人浪漫

2021-03-07 20:00

樂隊Tonick主音趙善恆（恆仔）首次獨自執導的電影《一秒拳王》，邀得周國賢（Endy）與泰國男神查朗桑提納托古（Nonkul）主演，Endy更為該片操傷髖關節又打到眼角爆缸，跟他操出「男人的浪漫」的恆仔表示整個過程一世都不會忘記，問到點報答對方？他笑道：「兄弟間講友誼，食餐飯飲個酒囉。」採訪：黎寶倫　化妝、髮型：Kylah Chan Makeup and Art　場地：RisingStar Muaythai Gym

繼3年前跟甄柏榮共同執導《救殭清道夫》後，兩人於意大利河邊許下承諾，各自製作一齣電影後再合作，卒之，趙善恆獨自執導的首部電影《一秒拳王》終於面世！「上次大家做自己擅長嘅崗位，今次去到後期個個部門都要跟晒，我就打番電話問佢點處理，雖然合格，冇辜負台前幕後嘅努力，但仲有好多進步空間。」事前，飾演拳擊手的他又跟Endy一起進行5個月地獄式訓練，恆仔笑言是一種「男人的浪漫」，「一班大男孩喺度就唔衰得，你做10吓，我就做20吓，大家互相鼓勵、催谷。（虐待到Endy憎你？）唔會啩，大家都係為件事，佢都好期待呢部電影。」

談到Endy的角色憑一秒預知能力在擂台重燃人生鬥志，恆仔盼帶岀以一秒改變命運的訊息，「而家世界好混亂，好多冇諗過嘅嘢都變成現實，我覺得而家嘅現實都係基於之前一秒一秒累積而嚟，將來會變成點？都係靠我哋一秒一秒努力去改變，我好相信每人都有改變將來嘅一秒，希望呢部電影畀到力量大家一齊撐落去。」不過，問到有一秒預知能力想改變甚麼？他笑言：「一秒喺商業社會冇乜用，只喺運動發揮到作用。」該片將於3月11日上映。