頭痛5日入院檢查搵唔到病因　李蘊苦呻：痛過生仔陣痛！

2021-03-05 14:00

現年29歲的李蘊（Renee）於15年下嫁內地金融才俊羅章冠後，三年抱兩，育有4歲大女羅紫晞和2歲兒子羅明新。自從升呢人母，Renee便淡出娛樂圈專心相夫教子，仲不時於社交網貼出一對寶貝的合照晒幸福，不過要湊大一對仔女確實唔容易，加上現時疫情仍未受控，承受巨大壓力的她近日身體都響起警號！昨晚，Renee於IG貼出一張躺在病床上的自拍，並留言：「個頭劇痛咗5日，每日不定時痛大半日…果（嗰）種痛…好似孫悟空比（俾）師父唸咒語咁…我每日就好似孫悟空咁…一d（啲）都無誇張…攬住個頭典黎（嚟）典去…行又行唔到…不停慘叫同喊…雖然係無用…但除咗呢d（啲）我咩都做唔到…」

Renee又透露連日來不停去看診找病因，即使吃止痛藥或打止痛針都冇用，直至昨日醫院終於安排了牀位給她，讓她能做多些檢查。無奈做完磁力共振及多項檢查，暫時一切報告都顯示正常，還未搞清楚頭痛成因，今日將進一步進行全身檢查的Renee說：「如果都係無發現問題…而我繼續痛……醫生話我有機會係『偏頭痛』。唔係嘛，『偏頭痛』可以咁痛嘅咩？？」自言昨日由下午1點痛到夜晚9點的她，苦呻痛起上來「電話都想掉咗佢」，更謂︰「而家我呢隻痛我可以大膽講，痛過生仔陣痛！」結果待晚上頭痛稍為好轉，Renee即出Po向網友求救，希望集思廣益找出解決辦法。