【獨家】老公李丞責全程貼身呵護　劉倩婷挺巨肚出巡買新衫

本報於去年10月獨家踢爆，著名堪輿學家李丞責博士與09年港姐冠軍劉倩婷（Sandy）追牛B成功，今年1月中趁35歲生日，Sandy便於社交網正式公布佗B的喜訊，當時「愛妻號」李博士還買花及靚酒，準備親自下廚冧老婆。事隔一個多月《頭條日報》再拍得，剛開完Baby Shower的Sandy日前挺住巨肚，繞實老公到尖沙咀買新衫，李博士仲全程對太太細心呵護，十分恩愛！採訪：譚壹致、袁東亮

新年添新衣，尤其懷孕中的劉倩婷腹部日漸增大，啲衫自然唔啱Size，所以在封館前，她在老公李丞責博士陪同下到K11 Musea行街，同行仲有兩名品牌女公關專人服侍。當日下午約3點甫會合公關，Sandy即時從手袋摷出4封大利是給對方，其間見老婆粗身大細邊行邊摷唔太方便，李博士都好貼心地幫手抽住個包包。之後，李氏夫婦恩愛繞實到Burberry專門店買衫，Sandy好快手就睇中一件10,500蚊的杏色茄士咩連帽斗篷，並試上身。

穿貼身長Tee襯Leggings的Sandy，脫去短版外套後，9個月「巨肚」隨即現晒形，不過貪靚的她仍腳踩兩吋高踭白色Boot，好在全程都有老公扶到實。笠上斗篷後，Sandy籮咁大的巨肚即完美地遮住，她於鏡前雙手插袋狂擺Pose，又擰向老公問好唔好睇？李博士就好Sweet咁幫太太整理衣服，然後圍住對方兜咗一圈，仔細睇完再模一模孕肚即讚靚，甜到入心的Sandy亦開心到露出笑眼。最後都冇睇啱其他衫，Sandy就着住新衫繞實老公離開。