盼演藝家族齊亮相 林曉峰暫時唔請曾志偉跨台演出

林曉峰（阿 Lo）與家姐林珊珊大女西瓜（李澄）為電視台拍攝系列式宣傳片，雖然兩舅甥合作機會不多，但就算一鏡到底也難不到他們。西瓜說：「阿Lo拍過呢個宣傳系列，所以駕輕就熟，而且同佢又合作過，我哋喺屋企時，佢亦試過帶住我哋一齊練習拍嘢，不過次次都俾媽咪打斷潑我冷水。但係今日都有少少壓力，因為要一鏡直落，要排練走位，好彩同阿Lo好有默契，所以呢個鏡頭一日之內拍晒，成條片都係拍咗4日半。」
阿Lo指已是第二次跟西瓜合作，之前去過杜拜拍旅遊特輯。他說：「呢個系列嘅電視宣傳片，由第一輯我已經開始拍，今次第二輯就搵埋西瓜一齊，但係負責畫外音嗰位高人（林海峰）就仍然係見聲唔見人。」西瓜立即插嘴說：「咁第三輯一定要搵埋媽咪（林珊珊），佢應該恨咗好耐，我都好期待喺鏡頭前面話返佢『爭住睇電視』、『唔畀我煲劇』。」
阿Lo和應説：「咁重有我舅父啦（狄龍）表弟啦（譚俊彥）我大佬 （林海峰）都可以邀請佢哋一齊出現喺呢個屋企，咁就好啦。不過我就暫時唔會邀請曾志偉先生嚟加入拍攝，等佢喺嗰邊做耐啲先啦，聽講話新簽約嘅歌手可以自由亮相其他電視台，咁希望未來演員、工作人員都得啦，成個香港演藝圈大融和就好啦。」