【維港會】遭女友施壓向母借錢買樓 公屋男向同事呻無晒生活

有網民在網上討論區「親子王國」發文，稱家住公屋的男同事本來生活平凡無大負擔，但自從認識女友後被施壓買樓，只好花光積蓄兼向母親借錢置業後，男同事向發文者苦笑道「無晒生活」。

發文者指，男同事本身與家人同住公屋，一向無經濟壓力、收入穩定，每月有些錢儲存下來，直至認識了現任女友，人生就大轉變。

發文者指，剛開始女方小鳥依人甚麽都説無所謂得男同事歡心，感情一路發展下，而且男方「心諗女友唔係住緊樓價貴嗰種屋苑，係好普通嘅舊私樓，感覺同公屋冇太大分別，覺得女友都唔會嫌住屋環境有咩太大差距」。發文者指當女方都表示要預備結婚，要求男同事買一隻大鑽戒訂婚，男同事仍然覺得無問題，認為展現誠意與承諾都應分。

結果不久之後女方就繼而提出買樓建議，男同事並不情願，因為「一心諗住婚後繼續住返間公屋，但佢亦唔敢反對，只係聽從女友，想對方開心」。發文者形容，因女方鍾情新盤，男同事於是開始留意新樓盤，但可以應付到首期的選擇不多，為求買樓連將軍澳日出康城都在考慮之一，最終用盡積蓄及向媽媽借錢購入。

發文者稱，「當大家為佢成為業主而興奮時，佢向住我哋苦笑真係將會自成一角，往後嘅日子就只有為供樓而工作，食個午餐都要度住度住，而佢到呢刻都唔敢向女友訴出心聲!」

有網民質疑，「點解佢會覺得有女仔肯同佢搬入間公屋，仲要同佢屋企人一齊住呢，唔通佢靚仔過古天樂？啲咁冇大志嘅男人有人肯嫁佢都偷笑啦，佢仲想點呢」、「有呢個女朋友真係執到，遲下你同事實好多謝個女朋友，買磚頭係保值，有能力買樓，當然向上流，所以唔怪之得社會上個個歧視公屋仔。樓主同事嘅諗法真係好常見，呢啲價值觀仲係公屋户代代相傳，個女仔就算住舊私樓，眼界都係另一層次，如果真係咁大怨氣，放生個女仔啦，個女仔值得更好嘅男人」、「搬去公屋同老爺住，唔好意思我即時諗起香港愛情故事嘅白彪」。

帖文轉載自「親子王國」《同事買左樓但係話冇晒生活? 》