【句句有骨】老公送電單車做情人節禮物 謝安琪曲線公審張繼聰

謝安琪（Kay）與張繼聰一向是圈中的模範夫妻，結婚14年日日初戀咁Sweet，更不時在網上互動耍花槍，你寸我一句，我又窒返你，溫馨又搞笑。昨日情人節，Kay在IG公告收到老公送嘅情人節禮物，就係一部電單車，不過重點係張太並冇電單車牌，仲要送禮後，張生即刻搶用「禮物」出街耀武揚威，難怪張太要寫文「多謝」老公。

Kay在IG寫咗一篇關於「禮物的意義」的文章，透露阿聰送了一部中古棍波電單車給她作禮物，但她未有電單車牌，又笑指如果去考電單車牌，亦都只會考自動波，暗示老公的禮物對佢完全冇用。Kay搞笑表示收到禮物後好驚喜，又指這份禮物啟發了她，成為她的人生轉捩點，Kay幽默表示：「佢送呢架我自己揸唔到嘅電單車畀我，一定係代表咗佢想鼓勵我跳出自己嘅既定框架，寓意只要我夠膽嘗試，就可以飛身躍起，騎上電單車開展一段嶄新嘅人生旅程，睇到更多不一樣嘅風光，一定係咁。」

之後Kay又暗寸阿聰唔理老婆，「自己揸走部車周圍兜風」，最後她又指：「所以話一份好嘅禮物，你係可以有好多層次去欣賞，即使伴侶送一架你用唔着嘅電單車畀你，然後佢仲自己揸返，你分分鐘得着仲多。」句句有骨，字裡行間都感受到Kay的不滿。好友賴慰玲留言笑指：「你先生愛得你好有Layer。」Kay亦幽默回覆：「同佢嘅演技一樣，都好講層次。」

昨日情人節與阿聰一同去揸電單車兜風的張振朗亦留言表示：「我終於知道以後送禮物應該係咩方向。」之後Kay亦有幫老公澄清：「同揸電單車一樣『帶返個頭盔先』佢其實仲有送花同埋其他禮物嘅。」