加盟古天樂Baby新公司首位藝人 ANSONBEAN承諾加倍努力

《全民造星III》季軍陳毅燊（ANSONBEAN）於情人節宣布強勢加盟Cool Style，成為古天樂及Angelababy新公司旗下第一位藝人。

ANSONBEAN自加盟公司後即密鑼緊鼓投入工作，他自言未有情人，所以情人節沒節目，特地在初三赤口兼情人節這天，回到公司跟經理人Kim Chou拜年，祝對方情人節快樂，以答謝其栽培。年輕又有活力的ANSONBEAN還一邊跳著舞一邊向Kim拜年，祝福大家心想事成一帆風順，憨態可掬一臉傻氣的，逗得公司一眾同事開心不已。

對於能夠成為寰亞傳媒集團、天下一集團合組的Cool Style旗下第一位藝人，ANSONBEAN自覺十分幸運和榮幸，更賣口乖說一直喜歡老闆古天樂和看對方的戲，感覺好刺激。為了不負公司期望，ANSONBEAN承諾會加倍努力：「我依家保持住一個星期都會做幾首歌嘅demo，先做一個庫存，然後定期再畀啲大家聽，雖然未知公司會唔會揀到嚟用，但我覺得咁樣會進步得快啲。演戲上嘅練習，我都會去嘗試，雖然之前有試過演戲，但我自覺未掌握到果個技巧，仍然未係一個演員。」說罷立即坐言起行，練習一下拳擊踢腿，似有意向動作電影方面發展。

問到未來會朝那方面發展？ANSONBEAN說：「我承諾我會搵到一個平衡，喺各方面都會努力，去練習我唔同嘅技能及工作，我知道我前面仲有好多成長及進步空間，所以我會每個星期定時去反省，然後再定新嘅指標，去催谷自己。更加要多謝粉絲嘅支持，你哋由一開始就支持我，我有時就算練習到全身冇力，但一想到你哋對我嘅期望，就會即刻起身再努力過，所以你哋嘅支持真係好重要。」