【獨家】為賀劉倩婷35歲生日　李丞責買花下廚𠱁老婆

著名堪輿學家李丞責博士與劉倩婷（Sandy）去年被爆追B成功，為𠱁明天（24日）生日的太太開心，李博士昨日快閃尖沙咀買粉紅永生花砌成的兔公仔及靚酒，準備親自下廚同Sandy浪漫慶生。採訪：張詠森

明天便是Sandy的35歲生日，年年也跟太太Sweet爆Fine Dine慶生的李博士，今年因為疫情嚴峻，加上晚市禁堂食令，所以未能跟老婆出外撐枱腳，於是決定製造浪漫驚喜，買嘢𠱁吓大肚妻開心。昨日傍晚5時許，李博士單拖現身海港城一間花店，其間在店內左睇右睇，最終揀了一隻約16吋高、以粉紅色永生花砌成的兔仔，價錢約2,000蚊；隨後，他再走到附近的酒窖買了一支香檳，由揀花到買酒全程用咗15分鐘，李博士便火速完成任務返屋企。臨登上坐駕前，問到為Sandy準備甚麼生日驚喜？他說：「希望同佢（出街）食到Lunch啦，自己都會下廚，我煮嘢都叻！」