【維港會】巴士大媽飛象過河 被影相得戚擺「甫士」

搭巴士不時會遇到無品乘客，不過有網民就遇到一名另類大媽，雙腳飛象過河之餘，當網民拿出手機影下罪狀時，大媽更擺好「甫士」大方任影，令網民好氣又好笑。

網民在「Mei Foo 美孚」Facebook發帖，「以為自己好X型！影佢仲要比手勢，踩完又坐對面再踩俾我睇！」相中一位大媽身穿一件紫色大褸，腳套一對紫色棉靴，更手拿一隻紫色布袋，配搭非常吸睛。大媽把雙腳踩在對面座位上，得戚比出「V」的手勢，以示「任影唔嬲」。

不少網民都批評大媽自私及無公德心，「咁老仲咁自私」、「可能佢鞋底之前消毒咗呢」、「真係以為俾咗錢就係坐私家車」。