【獨家】細訴創作《造星III》作品感受 顧定軒絞盡腦汁：多咗白頭髮

既然大家咁鍾意Zeno（顧定軒），《頭條》當然識做，將Zeno專訪其他精彩內容大公開。Zeno在《全民造星III》有份參與的小組作品，獲得評判、觀眾和網民一致讚賞，討論度極高，原來為了有更精彩的演出，他真的絞盡腦汁，26歲的他感覺這短短5個月，似急速老化5年，他更自爆因而多了白頭髮，認真慘慘豬囉！撰文：杜淑霞 攝影：李維隆 髮型：Faust @ the attic 化妝：mon 場地：夕拾x閒社

Zeno由7月開始參加《造星III》，覺得時間過得好快，想不到眨下眼就到12月，仲覺得自己衰老了，相當搞笑，「好似過咗好耐，好似過咗5年咁。（有冇老到？）我多咗好多白頭髮，唔係我自己發現，係我啲朋友係咁講，我髮型師都有啲詐型『你係咪諗太多嘢，你不如唔好諗咁多嘢啦！』我諗因為喺《造星》入面要絞盡好多腦汁，因為每一round都好短時間，要完成好多嘅作品，每日諗好多idea，每分每刻都喺度諗。」



談到Zeno有份參與的多個小組演出作品，都得到外界激讚，他也覺得辛苦得來，特別開心及有滿足感，「我喺呢度搵到好多唔同嘅嘢，譬如表演係咩？又重新定義咗其實自己身份係乜嘢，以前係個演員，嚟到呢度就係想試啲唔同嘅嘢，結果真係試到跳舞、唱歌，可以將戲劇嘅嘢擺喺舞台上面，自己係好鍾意每一個作品。開頭都擔心自己迫自己做一啲自己唔擅長嘅嘢，自暴其短，你又唔係唱歌特別好，又唔係識跳舞，唔好攞自己嚟搞，但係又膽粗粗去參賽。自己一向都係咁，我行演戲呢條路都係咁嘅心態，試吓囉！放手一搏，想做就去做，我覺得冇後悔嘅，冇諗過真係可以搵到啲新嘢出嚟，可能以往《造星》見到嘅作品，比較多唱歌同跳舞，今次就算有人係擅長唱歌、跳舞，但擺多咗戲劇嘅原素入去，同埋大家接受喺電視舞台上，仲有內心好多情感，或者一啲故事劇情。」

似成長一課


眾多《造星III》演出作品中，要Zeno揀一個最喜愛項目，他想了想最後揀了觀眾都勁like，大讚感動的《給十年後的我》，他認為項目意義重大，亦是他比賽的轉捩點，「好似成長嘅一課，因為自己想嚟試新嘢，但過程入面好多緊張同包袱，唔係放得太低，始終自己以演員身份入嚟，有啲壓力，我係一個好幸運、有好多機會嘅人，人哋睇你個standard會高咗，壓力會影響咗創作，會局限咗自己，但係《十年》呢個主題，真係放低晒所有嘢，唔可以有一絲保護膜，唔可以再戴面具，搵番我哋最原本嘅自己，過程我哋每日都喊到缺堤，我哋稱每日都係『眼淚放題』，節目剪出嚟只係一少部份，我哋係喊到七彩，但唔係唔開心，係感動，原來我哋有時太過橫衝直闖，好似一生淨係得一個目標，可能錯過一啲經過嘅人，唔記得自己初心，呢個作品可以有個休息時間，呢個逗號好緊要，令我搵番我之後嘅動力，之後更加有信心去行之後嘅路。」



至於《Wish》及《我們》兩個高口碑的項目，Zeno就最鍾意《Wish》的創作過程，「《Wish》係最original嗰5個隊友，憑空去構建一個故事同表演出嚟，我哋都覺得有啲沙石，但係第一次第一隊嘅同伴，活生生唔保留唔怕醜講自己諗法，成就咗呢個作品，可能唔完美，但過程好開心。」至於《我們》，他覺得是作品中，最大挑戰的一個，「喺大眾平台上用咁樣題材好大膽，我自己都有啲關口要過，我一直都有演過類似角色，點樣可以轉化成觀眾可以理解，某程度大家知道我演過類似嘅角色，對我要求又會再高啲。雖然我同Manson係男主角，但係最大主角係『我們』每個A組成員、『戰狼十一』，呢個故事唔係單單講我哋兩個人，係講每個人心目中都有啲錯過咗嘅人，有啲遺憾，未必係人可能係事，每一個人都有我哋嘅『我們』。」