【維港會】結婚斟茶收老細奪命追魂call 網民果斷辭職

結婚是人生大事，相信各位新人都會將公事閒事拋開，專心處理婚禮事宜。惟有網民就發文大呻，自己在結婚斟茶予父母時，竟收到工作狂老闆「急call」，最終決定當晚果斷辭職。帖文引起不少網民熱論。

有網民近日於Facebook專頁「辦公室日報」投稿，指自己的老闆是工作狂，除了周六日假期私人時間會找他談公事外，連凌晨亦會照搵。老闆每日都會開會，會上主旨就是向員工施壓，要員工「跑數」，「老細係工作狂唔緊要，佢要自己嘅員工都係工作狂，準時收工黑你面，但就算你收到工，都唔使旨意安安樂樂行街睇戲食飯，因為佢總會用msg同埋電話係咁問你嘢。老細開咗個WhatsApp group，如果佢send咗啲information或者問題出嚟，之後冇人reply，佢係會特別tag你窮追猛打」。

而更過份的是，樓主結婚當日，對方亦不斷以whatsapp轟炸他，「唔好意思知你今日做新郎，但我想問下許生嗰份contract仲差啲咩？佢唔簽係咪有咩concern？而家啲價係點？」樓主指，「我好記得自己同老婆斟茶畀父母嘅時候，手提電話係不斷震不斷震，斟都斟得唔自在，之後見到有7個missed call」。

樓主批評，老闆雖然口頭上說不好意思，惟語氣不耐煩，令他於新婚當晚就與太太商量辭職及去向。他指出，雖然公司工資較同行高出一萬元，惟太太認為「寧願我多啲時間陪佢，唔好食餐飯都係咁覆短訊」。

最誇張的是，樓主離職一年後，對方仍依舊whatsapp上詢問公事，並借機邀請網民回巢，不過樓主堅決拒絕。樓主說，「賺錢係工作嘅目的，工作只係賺錢嘅方式，我而家就係咁喇，人工低咗，但開心咗，健康咗，因為有返自己嘅生活，始終每個人追求嘅嘢都唔同，最緊要自己舒服。」

帖文一出就惹來網民熱議，不少人認為辭職的決定很好「講得岩（啱）！！呢種老細改變唔到，自己走好過」，亦有網民留言表示自己曾有類似經歷，指自己結婚時請姊妹幫手保管電話，「一簽完紙轉妝即刻收到個電話cold call搵我老公」。有網民更表示家中進行白事時被老細急call，「破緊地獄都要覆電話」。