【獨家】陳蕊蕊探靈爆喊要腰斬節目 KB李健宏做人正氣唔怕鬼
2020-11-18 22:23 
十年前憑YouTube大整蠱節目《玩爆你個腎》而爆紅的李健宏（KB），由鼓手踩入幕前，最近搞埋壞人製作中心，殺出一條新血路。KB喺疫情下冇畀自己停，繼續製作網上靈探節目《又要睇又要驚》，日前KB帶理嘉賓陳蕊蕊去咗瀑布灣探靈，KB親自落水超渡亡魂。採訪：方騫平
網上靈探節目《又要睇又要驚》兩年前拍第一集，當時只係喺萬聖節去山頂荒廢屋取景，點知就一直玩落去。日前大隊去咗日治時期「亂葬崗」瀑布灣探靈，KB話呢度發生過多宗離奇意外，甚至有富家女放狗墮崖，所以有唔少靈異傳說。當晚因為打風，天氣唔係好穩定更添迷幻，原先想過去當年日佔時期用嚟做軍事暸望台嘅廢置石屋，因水漲都去唔到，大隊唯有留返喺石灘拍攝。
師傅先為KB同蕊蕊點起香蠋，播住日文鬼歌《籠中鳥》做招魂儀式，跟住兩人一邊燒衣紙，一邊透過磁場探測機跟靈界「溝通」，探測機隱約傳來講英文、講廣東話，成人及小朋友對話，嚇到蕊蕊唔敢向後望，猛話對唔住打搞晒，而KB就淡定得多，繼續對住探測機發問問題。之後師傅掟完西瓜落水後，便用紅繩綁住KB腰間落水做翻盆儀式超渡亡魂，蕊蕊則在岸邊打鼓。當晚頭重重嘅蕊蕊心慌慌：「其實我一直都唔做靈異節目，唔知點解上兩星期竟然答應KB拍，嗰次去咗一間荒廢咗嘅老人院，喺招魂儀式後Feel到個頭劇痛，爆喊話唔想再拍落去。」KB形容蕊蕊好渣：「佢喊到崩潰，第一次有嘉賓咁激動要腰斬個節目，其實我好正氣，又冇害過人就唔使擔心，我覺得鬼唔恐怖，人先至最恐怖。」
最新回應