66歲生日再玩社交平台 林青霞晒命式貼文分享幸福事

2011年，林青霞開通微博同Fans溝通，之後不時更新，唔算太密但過時過節自己生日都會Post吓嘢，不過14年12月25日Post完繼女邢嘉倩整嘅聖誕蛋撻後就再冇更新。

相隔六年，剛於11月3日度過66歲生日林青霞重回微博，回歸第一句就係，「開通了！MY GOD！大家好！」之後再貼文，「各位朋友久違了，總算又開通微博了，謝謝新浪網和理想國，現在又可跟大家分享我的感悟和心得了 ​​​​​​​​。」估計大美人唔記得微博密碼要搞一大輪先可以重新再玩，嗰句「總算」睇得佢鬆一口氣。

之後林青霞在微博透露2020年送畀自己嘅生日禮物就係自己嘅新書《鏡前鏡後》，仲話好髙興大陸、香港同台灣都喺佢生日同時推出。 ​​​​然後又分享繼女邢嘉倩送畀佢嘅生日禮物，就係對方親手做咗一個木製書架賀大美人出書，仲放埋三本青霞嘅書《窗裏窗外》、《雲去雲來》及《鏡前鏡後》喺書架，另外24歲大女愛林就為媽媽將枱面放滿花，獲青霞大讚有心。

而早年不時傳出青霞同老公邢李源婚變，青霞在文中提到：「先生Michael 笑著對三個女兒説，『你媽寫了三本書，將來説不定拿個諾貝爾文學獎回來』。人家米蘭昆德拉九十多歲，寫那麼多經典小説都沒得獎，我拿什麼去得獎啊？不過既使是句玩笑話聽聽也開心。」青霞更透露4歲孫女為她炮製了蛋糕，祖孫三代齊齊慶生，字裡行間滲出超濃幸福感。