【獨家】點睇都唔似50歲 宣萱買家品計過度過好精明

宣萱(Jessica)簽咗古天樂做經理人後好多嘢做，拍劇又拍電影，雖然50歲但事業仍有大把可能，係呀，唔經唔覺宣萱已經50歲，人生呀。日前下午，着住便服戴咗Cap帽，點睇都唔似50歲的Jessica單拖去IKEA買家品，見佢揀儲物箱、防水床笠同花盆，每件唔過300蚊，但Jessica都好小心揀，甚至用埋軟呎去度位，買咗唔啱用就無謂啦。採訪:梁志明

當日下午，紥住條辮仔，戴住眼鏡及口罩的宣萱去銅鑼灣IKEA行街，見佢拎住電話一邊揀儲物箱一邊睇電話內嘅相簿，應該一早有心水貨品，揀咗一輪終鎖定一個$89.9的儲物箱，宣萱拎住軟呎係咁度，度完高度再度個箱嘅底部，度咗一輪終決定入手。

宣萱好忙
其實揀儲物箱時，宣萱都好忙，一邊聽訊息一邊揀嘢，從而發現宣萱有兩部手提電話跟身，一部紅色一部黑色。揀完儲物箱再去睇防水床笠，好適合家有一貓一狗嘅宣萱使用，單人$149.9，雙人$219.9，宣萱都揀咗一陣同樣有入手，最後睇埋花盆，呢個揀咗一陣就放棄，然後就去自助收銀櫃位找數，完成入手家品使命就去停車場駕車離開。